«9 секунд» киноны нээлтээс өмнөх үзүүлбэр Агинское сууринд үзэгчид дүүрэн болов
«9 секунд» киноны нээлтээс өмнөх үзүүлбэр зургадугаар сарын 1-нд «Амар сайн» кинотеатрт болов.
Тус кино нь хамт алба хаагчдаа болон байлдааны хөлөг онгоцоо өөрийн амиар хамгаалсан Орос улсын баатар, Номхон далайн флотын усан цэрэг Алдар Цыденжаповын тухай, бодит үйл явдалд тулгуурласан юм. Киноны продюсер Юрий Обухов нээлтийн үзүүлбэрт зорин иржээ. Киноны өмнө тэрээр ОХУ-ын сенатч Баир Жамсуевын хамтаар өөрийн сэтгэгдэл, кино бүтсэн үйл явцаас хуваалцжээ.
“Кино салбарт энэ олон жил ажиллахдаа Өвөр Байгальд, Агинское сууринд ирэхдээ л би анх удаа хүмүүсийн чин сэтгэлийн дэмжлэгийг мэдэрч, хоёргүй сэтгэлээр ажилласан юм. Кино бол эрхэм сайхан ажил. Олон хүн надаас яагаад энэ киног бүтээх болсон бэ гэж асуудаг. 19 настай залуу яагаад ийм үйлдэл хийх болсон бэ гэдгийг үзүүлэх нь маш чухал байсан. Тэр алдар гавьяаны тухай бодоогүй, зөвхөн өөрийн нөхдийг л аварсан юм”, - гэж Юрий Обухов ярив. Мөн тэрээр Алдарын ээж аавд, хүүгийнх нь тухай кино бүтээх итгэл хүлээлгэсэнд гүн талархлаа илэрхийлэв. Киноны гол баатрын ээж Билигмаа Зыдыгаевна, аав Баатар Жаргалович Цыденжаповынхон, төрөл саднууд, анд нөхөд, ангийнхан нь, нутгийн олон гээд “Амар сайн” кинотеатрт пиг дүүрэн үзэгчтэй байжээ.
Киног бүтээхэд нэр алдартай жүжигчдээс гадна агинскчууд олноор оролцсон тул таньдаг хүмүүс нь гарч, бас төрөлх нутаг, дацан хийд, хээр тал, үзэсгэлэнт байгалиа харж болохоор байлаа.
«Маш их сэтгэл догдлуулж, нулимс унагам кино болжээ.. Киног бүтээгчдэд, хязгаарын захирагч Александр Михайлович Осиповт, нутгийнхандаа тусалж дэмжсэнд баярлалаа. «9 секунд» киноны ачаар улс орон даяараа Алдарын байгуулсан гавьяаг мэдэж авч, залуучууд Өвөр Байгаль, Алдарын эцэг эхийн талаар илүү мэдэхийг хүсэж, түүнтэй дүйцэхүйц нэр төртэй амьдрахыг хүсэх болно”,- гэж сенатч Баир Жамсуев өөрийн Телеграмм сувагт бичжээ.
Агийн Буриадын тойргийн захиргааны дарга Базар Дугаржапов жүжигчид болон кино зургийн группын хамт олонд талархлаа илэрхийлж, Юрий Обуховт Талархлын жуух, үнэ бүхий зүйл гардуулжээ.
Кино 2024 оны есдүгээр сарын 26-наас кинотеатруудаар өргөн дэлгэцэнд гарч эхэлнэ. Энэ өдрийг сонгосон нь бас учиртай. Чухамхүү 2010 оны есдүгээр сарын сүүлээр Алдар Цыденжапов эсминец онгоц дээр томоохон осол гарахаас сэргийлж чадсан юм.
